Secretariu Geral FRETILIN deklara: FRETILIN seidauk hili nia candidato ba Presidenti Republika; husu militantes hein desizaun CCF nian

FRENTE REVOLUCIONARIA DO TIMOR-LESTE INDEPENDENTE

(FRETILIN)

KOMUNIKADU BA IMPRENSA

Dili, 21 Setembru 2011

Partidu FRETILIN seidauk halo desisaun formal se mak partidu nee sei apoia iha eleisaun ba Presidenti Republika iha tinan 2012. Desizaun nee Comite Central FRETILIN nian mak sei halo tuir nia knaar no tuir criteria neebe III Congressu Nasional neebe realisa foin dadauk determina tiha ona. Depois iha tempo neeba mak FRETILIN sei fo nia apoiu ba candidato neebe hili, deklara Secretariu Geral Partidu FRETILIN nian Dr. Mari Alkatiri iha Dili ohin.

Secretariu Geral partidu FRETILIN realsa katak tuir estatuto partidu nian, Comite Central FRETILIN nia desizaun mak bele fo kbiit ba estrutura partidu nian atu fo apoiu ba candidato ba Presidenti Republika nian.

“Partidu FRETILIN iha ninia prosesu interno rasik atu hili candidato neebe nudar partidu ami sei apoia iha campanha presidensial 2012.  Tuir estatuto partidu nian, criteria candidato iha tiha ona, no la kleur CCF sei halo reuniaun atu formalmente hili candidato neebe pre-enche criteria ba candidato chefe estado ba ita nia nasaun.  La iha dalan seluk. Se canidato ida hakarak hetan apoiu husi partidu FRETILIN tenke nunee duni.  Tamba nee mak agora sei sedu atu dehan iha ema ida neebe FRETILIN nia candidato,” affirma Dr. Mari Alkatiri ba media.

Secretariu Geral FRETILIN nian hatutan katak iha FRETILIN nia laran, hanesan halo dadaun ho eleisaun directa ba nia no Presidenti Lu Olo, presiza tuir prosesu neebe prescreve iha estatuto partidu nian.

“Nee signifika katak se se deit mak hakarak sai FRETILIN nia candidato ba Presidenti Republika tenke ema ida neebe preenche criteria neebe iha estatuto partidu nian, no neebe CCF nudar representante militantes FRETILIN nian bele fiar metin sei sai chefe estado ida neebe sei halau nia knaar ho responsabilidade ba estadu no povo, tuir lei no constituisaun, no ema ida neebe sei sai chefe estado duni, no la sai fali chefe de opozisaun ba governu ka chefe opozisaun ba opozisaun,” nia dehan.

HOTU