Reuniaun Dala Uluk ba CCF Foun iha Sabadu liu ba

FRETILIN

KOMUNIKADU BA IMPRENSA

Dili, 26 Setembru 2011

CCF Elege no fo Tomada Posse ba Vice Presidenti, Secretariu Adjuntos Foun rua, no membros Comissaun Politika Nasional no Comissaun Nasional Fiskalizasaun Foun; Kria Mos Conselho Consultivo CCF nian.

Iha Sabadu liu ba, loron 24 Setembru Comite Central Partidu FRETILIN nian halau nia reuniaun ba dala uluk desde III Congressu Nasional partidu nian iha sede CCF, Comoro, Dili. CCF, neebe lidera husi Presidenti Francisco Guterres Lu Olo no Secretariu Geral Mari Alkatiri, halibur ba dala uluk CCF foun neebe elege iha III Congresso Nasional Partidu nian.

“Reuniaun CCF konsegue delibera to’o hotu agenda ida neebe importante tebes atu completa partidu nia estrutura nivel nasional ba periodo tinan 2011-2016.  Maske sei iha adjuntu secretariu geral ida tan neebe CCF tenke hili, tamba III Congressu aumenta numeru adjuntus iha estatutu partidu nian husi rua ba tolu, eleisaun halau ho resultadu no halau tomada posse ba Vice Presidenti, Adjuntu Secretariu Geral nain rua, Comissaun Politika Nasional, no Comisaun Nasional Fiskalizasaun partidu nian hotu tama ba eleisaun tuir votasaun secretu. Resultadu eleisaun ida nee hotu hakat bot ida hodi hametin partidu nia estrutura nia efetividade no unidade nudar orgaun politiku.”

“Partidu liu husi CCF foun nee mos konsegue aprova kriasaun Conselho Consultivo ba CCF iha nivel nasional, distrital, sub distrital, sucos no aldeias,. Coselho nee iha objectivu atu halibur iha orgaun importante foun hirak nee eis membrus orgaun nasionais partidu nian, hanesan CCF , CPN no seluk tan, hodi bele contribui no partisipa nafatin iha futuru desenvolvimenti partidu  nian.  Nunee partidu sei convoca iha nivel nasional no sub nasional, eis membrus orgauns nasionais, antigos combatentes no veteranos, eis responsaveis estruturas organizasaun massa nian hodi tama ba Conselho Consultivo CCF nian,” deklara Presidenti partidu Francisco Guterres Lu Olo.

Iha reuniaun CCF nee Presidenti paridu no Secretariu Geral fo tomada posse ba Arsenio paixao Bano nudar Vice Presidenti FRETILIN nian, ba Jose Reis nudar primeiru adjuntu secretariu geral no Jose Manuel Fernandes nudar segundu adjuntu secretariu geral.  Iha fatin hanesan Presidenti no SG FRETILIN nian fo tomada posse ba membrus CPN no CFN.

Iha adjuntu secretariu geral ida tan atu CCF hili, maibe ida nee sei sujeitu ba eleisaun iha reuniaun CCF tuir mai hodi completa numeru adjuntus secretarius geral too tolu. "Maibe tamba terseiru secretariu geral nee presiza mos hare ba kestaun ekilibriu gender nian, entaun sei envolve cosulta ida luan liu tan molok bele apresenta candidatu ba CCF atu elege tuir eleisaun secreta," hatutan Presidenti Partidu ida nee.  

Presidenti partidu FRETILIN Francisco Guterres Lu Olo deklara katak ba nia reuniaun CCF ida nee hakat ida tan iha prosesu neebe hahu iha 2007 iha Holarua, Manufahi hodi re-estrutura no consolida partidu liu husi prosesu demokratiku, inklui mos eleisaun directa ba lideransa no estrutura husi aldeia to’o distritu neebe eleitu husi militantes rasik.

“III Congressu nasional Rekonhesidu nudar congressu ida nakonu ho transparensia no demokrasia. Votasaun iha reuniaun CCF foin halau nee mos lao diak tebes hotu.  Buat nee hotu hatudu katak FRETILIN nudar partidu hatudu momos katak Demokrasia funsiona makas iha ita nia le’t, maibe ita la fahe malu.  Nee mak susesu bo’ot ba ita nia III Congresso Nasional.  No ita sei consolida tan demokrasia no unidade iha ita nia le’et iha futuru.  Hametin FRETILIN no hametin Demokrasia nee sei nafatin prosesu ida neebe importante,” deklara Lu Olo.

HOTU