Governu tenke hatan detlhadamente no seriu relatorio todan husi Komisaun C, 23 Junhu 2010

FRETILIN

MEDIA RELEASE

Xefe bancada FRETILIN nian Deputado Aniceto Guterres ohin deklara katak ba dalan uluk parlamento nasional halau nia knaar konstitusional ho responsabildade tamba obriga suspende debate ba proposta orsamentu rektifikativu husi governo hodi obriga governo hatan ba preokupasaun no rekomendasoens todan tebes husi Komisaun C kona ba proposta nee.

“Horseik primeira vez mak ita hare deputados husi partido oioin apoia proposta husi Presidenti Parlamento katak presiza suspende debate hodi governo prepara atu hatan ho detalhadamente ba relatorio husi Komisaun B. Relatorio neebe tatoli preokupasaun no kritikas todan tebes husi deputados partido opozisaun no partidus AMP nian mos. Relatorio ida neebe forte tebes, liliu relatorio seluk iha tinan  ualu liu ba, tamba ida nee ezigi governo de facto hare fila fali proposta orsamentu rektifikativu tuir preokupasoens todan husi komisaun hotu. Relatorio neebe deklara katak governo de facto la konsegue justifika ba Komisaun katak sira presiza hasai tan US$390 milhoens husi Fundu Mina Rai, no katak hasai montante nee laos iha interese nasional.

“Nee hakat bot ba Parlamento Nasional ida nee halo kritikas hanesan halo dadaun, no sai hanesan ezame boot ida ba ita nia parlamento nia independensia nudar orgaun soberania.  Tamba nee mak governo tenke hatan. Sira labele halo hanesan dala barak ona uluk durante debate orsamentu estadu, bainhira Sr. Primeiro Ministro de facto, no Ministra Finansas de facto taka tilun deit ba perguntas no exigensias deputado sira nian, sira la hatan, no sira hodi usa forsa votos maioria nian atu nega deputado opozisaun sira nian direitu hetan resposta no evita explika ka hatan kiritikas no preokupasoens deputado sira nian.  Agora sira tenke hatan, tamba nee laos opozisaun deit ona.  Nee mai husi deputados husi partidu oioin deit.  Se governo la hatan ho detalhus entaun Parlamento nee lakon nia kredibilidade tomak nudar orgaun soberania, no governo de facto hamate demokrasia iha ita nia nasaun,” deklara Aniceto Guterres.

Horseik Povo Timor-Leste akompanha transmissaun direta ba Primeiro Ministro Xanana Gusmao nia intervensaun tuir neebe nia tatoli “susesus” governasaun no gestaun finansas governo nee nian. Maibe realidade tuir relatorio Komissaun C nian tatoli fali governo nia falhansu governasaun no gestaun la diak finansas estadu Timor-Leste nian. Liliu tamba falhansu boot Pakote Referendu nian neebe Komissaun C rekomenda tenke halo auditoria independente. Komissaun C preokupa mos ho governo no Instituisoens estadu nian neebe kria tusan depois mak husu parlamento aprova orsamentu atu selu tusan nee, neebe Komissaun konsidera karik hanesan administrasaun illegal no bele mos lalaok criminal.

“Preokupasoens hirak neebe tatoli iha relatorio nee seriu tebes. Laos deit FRETILIN mak preokupa, sosiedade sivil no ema barak mak preokupa. Biar deputado FRETILIN nian abstein ba relatorio Komissaun C nian, FRETILIN konkorda ho relatorio nia preokupasoens no rekomendasoens barak, liliu katak governo de facto la transparente ho informasaun neebe sira fo ba deputados iha proseso tomak kona ba proposta orsamentu rektifikativu ida nee.  Ida nee difikulta servisu deputado sira nian, no agora too ona tempo governo hatudu vontade atu sai transparente no responsavel liu itoan ba Parlamento Nasional ida nee. Sira tenke respeita Povo liu husi Povo nia representantes diak liu tan,” hatutan Aniceto.

Xefe bancada FRETILIN nee realsa mos katak dala ida tan Governo hatudu sira nia inkpasidade atu ezekuta orsamentu neebe parlamentu no halo plano neebe efetivu no bele fo benefisiu ba Povo Timor-Leste.

“Ita hare dalan ida tan katak sira lori proposta oramentu, ka orsamentu rektifikativu ida mai uma fukun nee, halo diskursu oioin katak presiza aporva tamba ba Povo nia benefisiu, maibe tuir mai sira halo transferensia tuir sira nia hakarak deit.  Ita labele fiar ona governo de facto ida nee, tamba sira nunka cumpir sira nia promesas. Mai iha nee dehan katak sira presiza osan nee atu halo ida nee, maibe depois lori halo buat seluk.  Sira kredibilidade la iha ona, nem itoan,” Aniceto taka.

FIM